Продуцентот Харви Вајнштајн, кој важи за еден од најмоќните луѓе во Холивуд, се најде во големи проблеми кога многубројни познати актерки го обвинија за сексуално вознемирување. По Анџелина Џоли и Гвинет Палтроу, душата си ја отвори и манекенката Кара Делавињ, која исто така наведе дека со него имала голема непријатност.
Британската убавица се огласи на „Инстаграм“ и ја почна својата приказна за Вајнштајн.
„Кога првпат почнав како актерка, работев на еден филм, а потоа добив повик од Харви Вајнштајн, кој ме праша дали сум спиела со жените со кои бев видена во медиумите. Беше многу чуден и непријатен разговор. Не му одговорив на ниту едно од неговите прашања и бргу го завршив разговорот, но пред да прекинам тој ми рече дека ако сум геј или ако одлучам да бидам со жена, особено во јавност, дека никогаш нема да добијам улога на стрејт-жена и дека нема да успеам како глумица во Холивуд“, напиша Кара и додаде:
„Една или две години подоцна, бев на состанок со него во предворјето на еден хотел, заедно со режисерот на филмот што требаше да го снимам. Режисерот го напушти состанокот и Харви ме праша дали сакам да останам да поразговарам со него. Кога се повлековме насамо, тој почна да се фали со сите актерки со кои има спиено и како им направил кариера, а говореше и за други непријатни работи од сексуална природа. Тогаш ме повика во собата. Бргу го одбив неговиот повик и ја прашав неговата асистентка дали автомобилот ми е надвор. Ми рече дека не е и дека бргу нема ни да биде, а потоа додаде дека треба да влезам во неговата соба. Во тој момент се чувствував немоќно и уплашено, но не сакав да реагирам толку нападно со цел на крајот да не излезе дека грешам за целата ситуација“, наведе успешната манекенка и продолжи:
„Кога дојдов, ми беше полесно затоа што видов и друга жена во неговата соба и веднаш помислив дека сум безбедна. Бараше од нас да се бакнеме и таа почна некако да работи по неговите упатства. Бргу станав и го прашав дали знае дека умеам и да пеам. И почнав да пеам. Мислев дека на тој начин ќе ја поправам ситуацијата. Бев нервозна. По пеењето, реков дека повторно морам да си заминам. Ме испрати до вратата и застана пред неа и се обиде да ме бакне во устата. Го спречив и успеав некако да избегам од собата. Сепак, ја добив улогата во филмот и секогаш мислев дека ми ја даде поради сето тоа што се случи. Од тогаш се чувствував ужасно што го снимив тој филм. Се чувствував како да ја немам заслужено таа улога. Толку се двоумев дали да проговорам за тоа. Не сакав да го повредам моето семејство. Се чувствував виновна како да направив нешто лошо. Бев исплашена поради тоа што ваква работа може да им се случи на многу други жени што ги знам, но ниту една од девојките ништо не проговорила поради тоа што сите беа исплашени.
Видете ја оригиналната порака што Кара Делавињ ја остави на „Инстаграм“:
