Џез-музичарот Владимир Четкар ја претстави својата најнова песна Travel The World, чиј комплетен автор е самиот. Песната е снимена во студија во Њујорк и во Њу Џерси со оркестар во живо.
Деновиве во Охрид тој го снима видеото што ќе биде промовирано следната недела. Песната Travel The World е најава за новиот албум, а Владимир е во преговори со неколку големи светски музички куќи кои ќе го издадат на музичкиот пазар.
„Албумот е во подготовка и дел од песните се веќе снимени. Целиот материјал ќе се комплетира по моето враќање во Њујорк. Промоцијата на новиот албум е планирана за почетокот на 2018 година, но верувам дека публиката нема да биде разочарана што ќе мора уште малку да почека на неговото издавање“, изјави Четкар за „Репортер“.
