Годинешниот „Блуз и соул фестивал“, кој по 21-ви пат го организира Дирекцијата за култура и уметност – Скопје (ДКУС), ќе понуди европски блуз. Во три фестивалски вечери со почеток во 21 часот, на 22., 23. и 24. септември во ноќниот клуб Станица 26 ќе настапат бендови од Македонија, Шведска, Грција и Унгарија.
Фестивалот ќе го отвори македонскиот блуз-бенд познат по клупски настапи „In the Mood“, а специјално за овој настан ќе биде во проширен состав со девет членови. По нив ќе гостува шведскиот блуз состав „Trickbag“ кој постои 20 години.
Втората фестивалска вечер е резервирана за грчкиот „Triple Fret Band“. Фестивалот в недела ќе заврши со унгарскиот блуз-мајстор на усна хармоника и пејач на блуз, Матјаш Прибојски и неговиот четиричлен бенд „Matyas Pribojszki Band“.
Влезниците за „Блуз и соул фестивал“ се по цена од 300 денари за првата вечер и 200 денари за втората и третата вечер и може да се купат во Југотон Рекордс и на благајната на Станица 26.
