Македонскиот филм „Исцелител“, со интернационален наслов Secret Ingredient, на режисерот Ѓорче Ставрески ќе се најде во официјалната натпреварувачка програма на филмскиот фестивал во Талин, Естонија, „Црни ноќи“, кој е домаќин на над 700 делегати од филмската индустрија.
По речиси две години од крајот на снимањето, филмот ќе ја доживее својата интернационална премиера во програмата „Први долгометражни филмови“ и ќе има три проекции за време на фестивалот. „Црни ноќи“ е еден од 15-те водечки филмски фестивали во светот. Фестивалот има три натпреварувачки програми: Официјална селекција, Први долгометражни филмови и Естонски филмови.
Филмот „Исцелител“ е прв македонски филм кој ќе биде прикажан во натпреварувачката програма на овој фестивал. Во филмот играат Благој Веселинов, Анастас Тановски, Аксел Мехмет, Димe Илиев, Александар Микиќ, Мирослав Петковиќ и Симона Димковска. Македонската премиера филмот ќе ја има на 19 ноември на фестивалот „Синедејс“.
