Руската безбедносна компанија „Инфовач груп“ го претстави својот паметен телефон отпорен на апликации што собираат податоци за корисникот.
Пред нешто повеќе од две седмици американските власти го забранија софтверот на московската компанија „Касперски Лаб“, чија некогашна директорка Наталија Касперски сега е на чело на „Инфовач груп“.
Паметниот телефонот наречен „тајга” блокира апликации што ги следат активностите на корисникот, посебно оние што се однесуваат на деловната комуникација, докуманти, фотографии, а исто така спречува и апликации што собираат општи информации за користењето на направата.
Тоа значи дека апликациите познати по прибирање податоци, каква што е „Џимејл“, која скенира текстови од електронската пошта, и натаму може да се користат на телефонот, со тоа што ќе бидат оневозможени да собираат и испраќаат податоци за користењето на телефонот и на другите апликации.
Иако „тајга” го користи оперативниот систем „Андроид“, тој е малку изменет во однос на стандардната верзија за да биде во согласност со софтверот на уредот. Првите 50.000 телефони се веќе доставени на вработените во компанииите, чиј косопственик е државата. Телефонот сè уште не е пуштен во слободна продажба.
Ова е последен пример за растечкиот технолошки судир, што некои го нарекуваат и технолошката студена војна меѓу САД и Русија.
Минатиот ноември Кремљ го поддржа планот – целиот софтвер на американскиот „Мајкрософт“ во руските државни служби да се замени со руски еквиваленти.
