Поранешниот претседател на САД, Барак Обама, ја откажа забавата по повод неговиот 60. роденден. Тој ја откажа журката по големиот број критики на негова сметка дека организирал забава во време кога бројот на заболени од коронавирус е сè поголем.
Обама имаше план да направи голема забава со 475 гости, вклучувајќи и свои соработници и познати личности, како Опра Винфри, Стивен Спилберг, Џорџ Клуни и други. Журка ќе има, но со многу помал број гости.
„Поради ширењето на делта-сојот во изминатите неколку дена, господин и госпоѓа Обама одлучија да го намалат бројот на гости и да ги поканат само членовите на семејството и блиските пријатели за неговиот роденден“, изјавила нивната портпаролка за „Њујорк тајмс“.
Прославата треба да се одржи во неговата голема куќа на островот Масачусетс, која ја купи за 11,75 милиони долари. Гостите што ќе бидат присутни на забавата претходно се замолени да се вакцинираат против вирусот. Обама денес полни 60 години, а журката е планирана за викендов.
