Секој град во Македонија си има свој посебен специјалитет по кој е добро познат. Симит-погачата е скопски специјалитет. Еден од ретките деликатеси што се прават и продаваат само во Скопје. Ако и постои некој град низ Македонија каде што се продава симит-погача, тогаш најверојатно мајсторот е дојден од Скопје или барем дека занаетот е пренесен од тука.
Симит-погачата е оригинален производ, и најдобрата „симитка“ се јаде токму тука.
Синтагмата леб во леб можеби најдобро може да го отслика значењето што го емитира. Таа по состав е иста тесто со тесто, а сепак сосема различна и најдобро е кога тие различности се споени во едно и само така се вкусни.
Тука доаѓаме и до разрешувањето на „вечната“ скопска дилема: кој дел е симитот, а кој – погачата? Симитот е збор со турско потекло (како, впрочем, и погачата) и означува печиво. Во случајот, значи, станува збор за лепчето, односно кифлата. Погача, пак, на турски е пита (Турците не го изговараат она „г“ или го изговараат многу меко, па нашето уво го слуша како „поача“), што ќе каже дека погачата е питата, односно празниот бурек.
Значи, симит-погачата е сендвич составен од лепче (кифла) и од мрсна пита без заире (сирење, месо или слично), која неодоливо потсеќа на бурек.
Симит-погачата е врвот на мултикултурата. Скопјаните секогаш остануваат скопјани – толерантни и трпеливи, чекајќи на ред и мирисајќи го својот скромен и прекрасен специјалитет, симит-погачата!
