Викендов во Штип се одржува 32. издание на фестивалот „Макфест“. На сцената во Домот на културата „Ацо Шопов“ се појавија четириесетина изведувачи, кои освен со музиката, оставија впечаток и со изгледот.
Повеќето пејачки оваа година беа облечени во долги или куси фустани со силни, впечатливи бои и со многу светки. Од фустани во црвена и виолетова боја, до чипка и мрежа, се можеше да се види на сцената. Дел од пејачите пак пееја во куси тесни панталониња кои ги искомбинирале со хулахопки со мрежа. Имаше и такви кои избраа цветови – и како украс на фустаните и како асесоари. Сепак, на сцената доминираа белата, црната, златната и сребрената боја.
Машките изведувачи одбраа класични костуми со темни бои и бели кошули, или комбинација од фармерки со маичка и палто или кожена јакна, па меѓу сите нив се издвојуваше Александар Тарабунов со костумот со црвено палто.
Финалето на „Макфест“ е вечерва од 20.30 часот.
