Синоќа, во македонската Филхармонија се одржа концерт во чест на британскиот пејач Фреди Меркјури. На сцената настапија голем број македонски пејачи и музичари, кои ги пееја познатите песни на британската група „Квин“, а на публиката ѝ приредија вистинско шоу.
Најмногу аплауз доби младиот пијанист Бобан Мирковски, кој со своите пријатели ги свиреше песните на Фреди. Специјален гостин на концертот беше Влатко Стефановски, а Мики Јовановски-Џафер и Биба Додева настапија со песните I Want To Break Free и Wе Will Rock You.
На сцената се појавија и Дани Димитровска, Ирена Димовска од групата „Памперс“ и Андријана Јаневска заедно со хорот „Про арс“. Гитаристот Ади Имери ги отпеа Love Of My Life и Bohemian Rhapsody.
За потсетување, концертот првин беше одложен поради автобуската несреќа во Бугарија, а синоќа за малку и овој концерт немаше да се одржи по лажната дојава за бомба во МНТ, па центарот на градот беше блокиран. Настанот беше во организација на „Баги комуникации“.
