Избор од 17 песни, од албумот Cowboys & Indians во 1994 година, до Taftalidze Shuffle 2020, се најдоа на компакт-дискот, а на пролет се очекува и двоен винил
Само неколку уметници од нашиот регион успеаја да постигнат забележителен успех на светската сцена и да го направат својот бренд препознатлив.
Ова му успоеа на Влатко Стефановски, виртуоз на гитара, кој поради својот уникатен талент и израз го обиколи светот. Пресек на исклучително успешната соло-кариера на еден од најголемите гитаристи на нашите простори веќе е достапен на „Greatest hits collection“, во издание на Croatia Records.
Компилацијата ја отвора темата „Cowboys & Indians“ од истоимениот студиски албум од 1994 година, по која одат „Кандилце“ и „Сараево“. Приказната хронолошки продолжува со еден од најголемите хитови на Влатко, песната „Џипси сонг“, а потоа следат хитовите „Калајџиско оро“, „Влатково оро“ и „Глуво доба“ од ценетиот албум „Влатко Стефановски Трио“.Тука се и песни од албумите „Кула од карти“, „Thunder From the Blue Sky“ и „Сеир“, а неизбежен дел од наследството на Влатко се и песните „Бистра вода“ и „Успаванка за Радмилу М.” од незаборавниот акустичен албум „Мајчин јазик“. Компилацијата завршува со „Funky Junkie“ и „Огледало“ од актуелното студиско издание „Taftalidze Shuffle“.
