Олимпискиот вицешампион Дејан Георгиевски реагира на одлуката на Агенцијата за млади и спорт да не му го додели најголемиот ваучер, парична помош што спортитите, клубовите и федерациите ја добиваат секоја година.
Иако го постигна најголемиот успех за Македонија на Летните олимписки игри во Токио и го освои сребрениот медал, а потоа беше избран и за најдобар спортист во 2021 година, најголемиот ваучер заврши кај светскиот вицешампион во карате, Емил Павлов, 500.000 денари.
„Почитувани пријатели. Фала му на Господ, тренирам како никогаш до сега, живеам за моментот кога повторно ќе ја израдувам Македонија, роднините, пријателите, целиот народ. Тренерите, клупските другари, сите сме фокусирани на Париз, ние сме одлучни, Господ ќе реши. Овој пат сакам да му се обратам токму на мојот народ, на новинарите, на сите оние што се радуваа заедно со мене кога стигнавме до историскиот сребрен медал, се обраќам до сите оние што, конечно, по долгиот олимписки мрак, видоа светлина за македонскиот олимписки спорт, до сите што се почувствуваа гордо и исполнето, до сите оние што кога го видоа македонското знаме на олимпискиот трон, се почувствуваа Македонци. Очекувано бев прогласен за најдобар спортист во 2021 година, но ни малку неочекувано, дознав дека спортските ваучери што ги доделува АМС, односно одлука за ваучери, се надевам несвесно цели да го понижи мојот нашиот олимписки успех, мојот олимписки сребрен медал, прв во историјата на независна Македонија. Никогаш нема да си дозволам да нападнам чиј било спортски успех, најпрвин затоа што така ме воспитале моите тренери, а потоа затоа што многу добро знам што значи спортскиот витешки мегдан, без разлика за кој спорт станува збор. Но, никако не можам да разберам како кој било друг спортист во овој момент може да има поголема финансиска добивка со спортски ваучер од мојот успех, никој здраворазумен во нашата држава нема да најде здрава логика во ова што беше направено од страна на комисијата за доделување ваучери при АМС. Срамно. Не сакам ни да помислам дека станува збор за намерно и свесно напаѓање на сребрениот олимписки медал, уште помалку не сакам да помислам дека во сето ова е вмешана политика или нешто слично. Само сакам уште денеска оваа неправда да биде решена, ова го барам исклучително од принципиелни причини, барам за да го одбранам со крв донесениот историски сребрен медал од Токио, барам јас, Дејан Георгиевски, олимпискиот сребрен медалист, но сакам заедно со мене да побарате и сите вие затоа што овој успех, овој олимписки медал, овој остварен олимписки сон ни припаѓа на сите нас и никој, апсолутно никој нема право да фрли сенка на него. Од принцип, сега за сега не сакам да навлезам и да ѝ посочам на јавноста низ какви премрежиња од институциите поминував пред да го освојам олимпискиот медал, веројатно ќе дојде момент и за тоа. Никогаш парите не ми биле мотив, мотивот ми е Македонија. Одиме во Париз, одиме по злато“, рече Георгиевски.
За потсетување, неделава Агенцијата за млади и спорт ја објави листата на спортски федерации, клубови и спортисти што добија помош преку ваучер-системот. Од федерациите најголема помош доби Ракометната федерација на Македонија, 15,8 милиони денари.
Двојниот европски шампион, РК „Вардар 1961“, кој настапува во Лигата на шампионите, доби најмногу пари од спортските клубови, а кај спортистите најголема сума доби светскиот вицешампион во карате, Емил Павлов, 500.000 денари.
Оливена Наковска-Бикова доби 400.000 денари, а Дејан Георгиевски и борачот Могамед Гаџи Нуров добија ваучери во вредност од 350.000 денари.
