Најдобриот македонски ракометар Кирил Лазаров и еден од најдобрите централни бекови Филип Миркуловски, против Чешка ќе го одиграат последниот натпревар во репрезентативниот дрес.
Вечер Македонија ќе го игра реваншот со Чешка во финалето на плејофот за пласман на Светското првенство 2023.
Лазаров кој е и селектор на репрезентацијата посакува било каква победа и остварување на целта, задржување на континуитетот на учества на големите натпреварувања.
„Верувам дека со помош на седум илјади наши навивачи кои ќе ни бидат ветер во грбот, а не психолошки притисок, ќе ја победиме Чешка. Најважно е да победиме без разлика дали тоа ќе биде со еден, два или повеќе голови. На нивни терен покажавме дека имаме квалитет. Знам и дека за реваншот Чесите ќе се подготват добро и дека нема да биде воопшто лесно. Ние имаме добар резултат, позитивен, никогаш сме немале ваков во еден бараж натпревар“, рече Лазаров.
Натпреварот ќе се игра вечер во салата „Борис Трајковски“ со почеток во 19 часот. Сите билети се распродадени па се очекува огромна поддршка од трибините за македонските ракометари.
За потсетување првиот меч одигран пред четири дена во Злин, резултатот беше нерешен 24:24.
