Опасен тренд што се шири на TikTok и другите социјални мрежи предизвика сериозни повреди кај деца, откако 10-годишно девојче се здобило со тешки изгореници на лицето при обид да испроба вирален „предизвик“ со играчка ставена во микробранова печка.
Мајката на девојчето, 42-годишната Шарлот од Бристол, предупредува дека нејзината ќерка Бела би можела да остане со трајни лузни и апелира родителите и училиштата сериозно да внимаваат на опасните интернет трендови што ги следат децата.
Несреќата се случила додека Бела била кај другарка и одлучиле да пробаат вирален тренд кој кружи на TikTok, Instagram и YouTube, а вклучува загревање на меки силиконски играчки во микробранова печка за тие да станат „порастегливи“.
„Кога влезе дома, веднаш видов дека лицето ѝ е целосно црвено. Изгледаше како да е удрена, а потоа забележав изгореници и плускавци“, раскажала мајката за британските медиуми.
Според неа, проблемот бил во тоа што силиконскиот надворешен слој не дозволувал децата да почувствуваат колку е жешка играчката одвнатре. Во моментот кога ја стиснале, таа пукнала и врелата содржина им прснала во лицето.
Британската Национална здравствена служба предупредува дека изгорениците кај деца, особено кога се на лицето, бараат итна медицинска помош бидејќи можат да остават трајни последици.
По несреќата, мајката започнала да истражува на интернет и открила голем број видеа на социјалните мрежи каде деца и возрасни покажуваат како ставаат вакви играчки во микробранова печка „за забава“.
Нејзиното предупредување брзо се проширило меѓу родителите, а се јавиле и други семејства со слични искуства. Една мајка од Бристол открила дека и нејзиното дете добило сериозни изгореници на лицето по идентичен инцидент.
Од TikTok соопштиле дека содржините што поттикнуваат опасно однесување и можат да предизвикаат повреди ги кршат правилата на платформата и ќе бидат отстранети.
Во меѓувреме, британските организации за безбедност предупредуваат дека неправилното користење на домашни апарати може да има сериозни последици и ги повикуваат родителите да разговараат со децата за опасностите од копирање интернет трендови.
Британската влада во моментов разгледува и дополнителни ограничувања за користење социјални мрежи кај помали деца, со цел подобра заштита од штетна содржина.
