Поранешен вработен во престижната приватна болница „Лондон Клиник“ доби официјална опомена од британската Канцеларија на комесарот за информации (ICO), откако се обидел незаконски да пристапи до медицинските податоци на принцезата од Велс, Кејт Мидлтон, и да ги понуди на продажба за финансиска корист.
Истрагата беше отворена во март 2024 година, откако се појавија информации дека лице вработено во болницата се обидело да ја прегледа доверливата медицинска документација на Кејт Мидлтон додека таа била хоспитализирана по операција на абдоменот.
Од Канцеларијата на комесарот за информации соопштија дека станува збор за намерна злоупотреба на исклучително чувствителни лични податоци, при што постоела намера тие информации да бидат откриени или продадени за финансиска добивка.
„Граѓаните мора да имаат доверба дека личните и медицинските информации кои ги споделуваат со здравствените институции се безбедни и заштитени. Кога таа доверба е нарушена, наша обврска е да реагираме соодветно“, изјави извршниот директор за регулаторен надзор во ICO, Ијан Хјулм.
Од „Лондон Клиник“ истакнаа дека целосно соработувале со истрагата и нагласија дека случајот бил изолиран инцидент, без докази за пошироки безбедносни пропусти во институцијата.
„Задоволни сме што истрагата заврши и што беше утврдено дека болницата не прекршила регулативи. Ова беше тажен, но изолиран случај“, соопштија од болницата.
Според резултатите од истрагата, не биле пронајдени докази дека податоците биле јавно објавени или дека постоела организирана злоупотреба на медицинските системи во установата.
Случајот предизвика огромно внимание во британската јавност, особено поради здравствената состојба на принцезата од Велс. Кејт Мидлтон беше оперирана во јануари 2024 година, по што неколку месеци се повлече од јавноста. Во март истата година таа откри дека прима третман за рак, а на почетокот на 2025 година соопшти дека болеста е во ремисија и постепено се враќа на своите јавни должности.
„Лондон Клиник“, која се наоѓа во близина на Риџентс Парк во центарот на Лондон, важи за една од најпрестижните приватни болници во Обединетото Кралство и со години е избор на членови на британското кралско семејство, како и на бројни светски познати личности.
Овој инцидент повторно ја отвори дебатата за заштитата на личните медицински податоци и потребата од построги контроли во здравствените институции, особено кога станува збор за пациенти со висок јавен профил.
