Потпретседателот на Соединетите Американски Држави, Џеј Ди Венс, и неговата сопруга Уша Венс добија четврто дете. Среќната двојка во неделата објави дека на свет дошол нивниот син Алек Нил Венс, а мајката и бебето се во одлична здравствена состојба.
Убавата вест ја споделија преку заедничка објава на Инстаграм.
„Со голема радост објавуваме дека нашиот син Алек Нил Венс се роди утрово. Уша и бебето се среќни и здрави, а нашите деца со нетрпение го дочекаа својот помал брат“, напишаа тие.
Во објавата упатија и благодарност до лекарите и медицинскиот персонал од Воената болница „Волтер Рид“ и Медицинската единица на Белата куќа.
„Неверојатните воени лекари и целиот персонал беа вистински благослов за нашето семејство. Искрено сме благодарни за сè што направија за нас“, порачаа Венс.
Четврто дете во семејството Венс
Џеј Ди Венс (41) и Уша Венс (40) се во брак од 2014 година, а три години подоцна го добија своето прво дете – синот Јуан (Ewan), роден во јуни 2017 година.
Во февруари 2020 година семејството се прошири со уште еден син – Вивек (Vivek), а во декември 2021 година ја добија и ќерката Мирабел (Mirabel).
Во ноември 2025 година двојката соопшти дека очекува уште едно момче.
„Многу сме возбудени што можеме да споделиме дека Уша е бремена со нашето четврто дете – момче. Таа и бебето се чувствуваат добро и со нетрпение очекуваме да го пречекаме кон крајот на јули“, напишаа тогаш.
Тие тогаш повторно изразија благодарност до воените лекари и персоналот кои, како што наведоа, им овозможуваат истовремено да ѝ служат на државата и да уживаат во семејниот живот.
Ги демантираа гласините за развод
Веста за раѓањето на нивниот син доаѓа неколку месеци по шпекулациите за наводни брачни проблеми, кои се појавија откако Уша Венс беше фотографирана во јавност без венчалниот прстен.
Нејзиниот портпарол тогаш ги отфрли шпекулациите, објаснувајќи дека таа едноставно понекогаш го заборава прстенот.
„Таа е мајка на три мали деца, постојано мие садови, ги капе децата и понекогаш едноставно заборава да го стави прстенот“, изјави портпаролот.
Се запознале на Јејл
Џеј Ди Венс и Уша Венс се запознале за време на студиите на Правниот факултет на Универзитетот Јејл.
Во март годинава, потпретседателот на САД на шега изјави дека успеал да ја убеди сопругата да имаат четврто дете, откако таа претходно му рекла дека може „или да стане потпретседател или да добијат четврто дете“.
Подоцна Уша за NBC News појасни дека никогаш целосно не ја исклучила можноста повторно да стане мајка.
„Едноставно не бев сигурна. Но како што минуваше времето, сè повеќе почнав да се радувам на таа можност“, изјави таа.
Со раѓањето на малиот Алек Нил Венс, семејството на американскиот потпретседател сега брои шест члена.
