Италијанскиот репрезентативен голман и член на Манчестер Сити, Џанлуиџи Донарума, стапи во брак со својата долгогодишна партнерка Алесија Елефанте. Двојката го кажа судбоносното „да“ по речиси една деценија љубов, а свадбената церемонија се одржа во живописното Локоротондо, на југот на Италија.
На прославата присуствуваа бројни роднини, пријатели и познати лица од фудбалскиот свет, а особено внимание привлекоа соиграчите на Донарума од Манчестер Сити.
Халанд и Ковачиќ меѓу гостите
Меѓу гостите беше хрватскиот репрезентативец Матео Ковачиќ, кој пристигна заедно со сопругата Изабел.
На свадбата присуствуваше и една од најголемите ѕвезди на Манчестер Сити, Ерлинг Халанд, во друштво на својата долгогодишна партнерка Изабел Хаугсенг Јохансен.
Халанд и Ковачиќ по церемонијата поминале дел од времето заедно со своите партнерки, а фотографите успеале да ги забележат во друштво по венчавката.
Венчавка во историска црква
За својот голем ден Донарума и Алесија избраа комбинација од класична елеганција и модерни детали.
Црковната церемонија се одржа во Chiesa Madre di San Giorgio Martire во Локоротондо.
Донарума носеше елегантен костум во боја на слонова коска, додека Алесија, која по професија е дизајнерка на ентериер, избра раскошна венчаница без ракави, со силуета инспирирана од класичните балски фустани.
Нивната приказна започнала уште во детството
Љубовната приказна на Џанлуиџи Донарума и Алесија Елефанте има корени многу пред голманот да стане светски познат фудбалер.
И двајцата потекнуваат од Кастеламаре ди Стабија, каде што се запознале уште како деца и оделе на училиште заедно. Сепак, нивното пријателство прераснало во љубовна врска дури неколку години подоцна.
Заедно се од 2016 година, токму во периодот кога Донарума го започнуваше својот голем фудбалски подем како првотимец на Милан.
Низ годините двојката настојуваше приватниот живот да го држи подалеку од центарот на медиумското внимание. Алесија ретко се појавуваше во јавноста, па тие важеа за еден од подискретните парови во фудбалскиот свет.
Во 2024 година станаа родители
Во септември 2024 година Донарума и Алесија го добија своето прво дете – синот Лео.
По долгогодишната врска и новото поглавје како родители, двојката сега ја круниса својата љубов и со брак, опкружена со семејството, пријателите и дел од најпознатите имиња од светскиот фудбал.
