Натали Портман првпат јавно зборуваше за животот по раѓањето на своето трето дете, прво со партнерот Танги Дестабл. Во интервју за „Харперс базар“, 45-годишната оскаровка откри дека бебето ѝ донело нова радост, но и поинаков поглед кон нејзините две постари деца.
„Исполнета сум со восхит и радост поради ова мало волшебно суштество“, изјави актерката.
Портман објасни дека повторното мајчинство ја потсетило колку брзо растат децата. Гледајќи го бебето, повторно станала свесна колку неодамна и нејзините постари деца биле толку мали, а денес веќе имаат сопствени личности, смисла за хумор и идеи.
Актерката е мајка и на 15-годишниот Алеф и деветгодишната Амалија, кои ги има со поранешниот сопруг, танчарот и кореограф Бенжамен Милпје.
Бременоста ја доживеала со повеќе смиреност и благодарност
Портман ја објави третата бременост во април, исто така во разговор за „Харперс базар“. Тогаш истакна дека таа и Дестабл се многу возбудени и дека можноста повторно да стане мајка ја доживува како привилегија.
За разлика од претходните бремености, овојпат чувствувала поголема смиреност и подобро знаела со кого сака да го поминува времето и каква атмосфера сака околу себе. Додаде и дека го цени секој момент, бидејќи претпоставува дека ова веројатно ќе биде нејзината последна бременост.
Деталите за бебето ги задржува за себе
Портман и францускиот музички продуцент Дестабл, познат и како Tepr, беа видени со бебето во Париз во септември. Актерката засега јавно не ги открила името, полот и точниот датум на раѓање.
Нивната врска стана позната во 2025 година, а двојката најголемиот дел од приватниот живот го чува подалеку од јавноста.
Во новото интервју, Портман се осврна и на приоритетите што ги има во оваа фаза од животот. Љубовта, добрината и можноста да се смее, според неа, се најважните нешта на кои сака да им го посвети своето време.
