Македонскиот џез на светска сцена: Националниот оркестар настапува со добитникот на две „Греми“ награди

Националниот џез оркестар на 21 ноември ќе настапи заедно со американскиот вокалист Курт Елинг на завршната вечер на фестивалот „Гимараеш џез“ во Португалија.

Концертот ќе се одржи во културниот центар „Вила Флор“ во Гимараеш, а со македонските музичари ќе диригира Џијан Емин. Настапот е дел од 35. издание на португалскиот џез-фестивал.

На фестивалската сцена оркестарот ќе му се придружи на Елинг, чие име повеќе од три децении е присутно на меѓународната џез-сцена. Американскиот пејач е добитник на две награди „Греми“ за најдобар џез-вокален албум.

Во текот на кариерата, тој соработувал со музичари како саксофонистот Бренфорд Марсалис и пијанистот Данило Перез, а настапувал и со Њујоршката филхармонија.

За Националниот џез оркестар, концертот во Гимараеш претставува ново претставување пред меѓународната публика. Најавата доаѓа по настапот на оркестарот со пијанистот Мишел Камило во Скопје, одржан во ноември.

Заедничкиот концерт со Курт Елинг ќе го затвори годинешното издание на „Гимараеш џез“, спојувајќи го неговиот вокал со изведбата на македонските музичари под диригентство на Емин.

Scroll to Top