„Подем на гревот“ на „Папаз“ го отвори 16. Моден викенд Скопје

Вчеравечер во хотелот „Мериот“ со ревијата „Подем на гревот“ на „Папаз“ започна шеснаесеттиот Моден викенд Скопје.

Дизајнерот Андреј Папаз Ѓоргиевски инспирацијата за оваа ревија ја добил од приказната за Содома и Гомора, два библиски града, синоними за грев, блуд и разврат. Колекцијата ја нагласува женската сексапилност инспирирана од човековата сексуалност и хедонизам. Дизајнерот употребил повеќе видови еко кожа, свилен жоржет, штоф и чоја.

„Деталите се преземени од традиционалната облека од Блискиот Исток“, вели Ѓоргиевски за својата колекција.

Сигма

Колекцијата на Sigma Jewelry е инспирирана од богатата традиција, засилена со тонови на розово и бело злато, проткаена со модерен изглед кој ги отвора сетилата на секоја жена. И оваа сезона тие на публиката ѝ претставија уникатни парчиња накит кои симболизираат среќа, женственост и елеганција.

Трета ревија на првата вечер на Моден викенд Скопје беше колекцијата „Маршот на боговите“ на дизајнерката Викторија Арсовска.

Викторија Арсовска

„Сакав да прикажам женственост и сексапил преку кроевите инспирирани од машки униформи и преку машката грубост на посебно избрани материјали. Во колекцијата доминираат корсети подзатскриени со капути и елеци од чоја и кожа, свилени фустани во комбинација со кожени ремени и метални копчиња, а лелеавоста на истите се противи на крутиот штоф,“ вели дизајнерката.

Ателје Коцарева

Првата вечер на Моден викенд Скопје заврши со претставувањето на колекцијата Art Deco на „Ателје Коцарева“, женствена, деликатна и раскошна колекција која раскажува приказна за безвременска жена изразена преку софистицирана, гламурозна, а смела визија.

„Секое парче е индивидуализирано, изработено од уникатни материјали, природни пердуви, рачни везови, и на посебен начин го осликува совршениот стил на 20-те години од минатиот век,“ вели дизајнерката Моника Коцарева.

Scroll to Top