Манчевски го снима седмиот филм: актерски ѕвезди и млади глумци во „Кајмак“

Милчо Манчевски го почнува снимањето на седмиот филм „Кајмак“. Во оваа црна комедија за две семејства, која ги критикува лицемерството и малограѓанштината, ќе глумат неколку македонски актерски ѕвезди, а како и во другите филмови на Милчо, ќе има и нови имиња.

Манчевски е сценарист и режисер, а филмот е европска копродукција, поддржан од Агенцијата за филм на Македонија, од филмските фондови на Данска, Холандија, Хрватска и на Бугарија. Македонската радио-телевизија е копродуцент. Филмот ќе се снима исклучиво на локации во Скопје.

„’Кајмак’ е безобразна комедија за две семејства, кои се пристојни на почетокот, а среќни на крајот. Се радувам како летен ден затоа што по сета напорна работа, сега почнуваме да правиме убава уметност, ама уште повеќе затоа што работиме со талентирани професионалци, кои се и добри луѓе. Животот е прекраток за да работиш со лоши луѓе“, рече Манчевски на прес-конференцијата, каде што ги претстави и актерите што ќе глумат во филмот: Камка Тоциновски, Сара Климоска, Александар Микиќ, Ана Стојановска, Сашка Димитровска, Дејан Лилиќ, Ѓорѓи Јолевски и други.

Претходно, во интрервју за „Репортер“ познатиот режисер раскажа дека секојпат кога избира главни актери за своите филмови, тргнува без очекувања, а ако му се допадне енергијата на некој глумец, спремен е да го смени и сценариото и да ја преработи улогата, како што го направи тоа со филмот „Бикини Мун“.

Scroll to Top