Сопругата на хрватскиот претседател, Сања Мусиќ Милановиќ, носи накит дизајниран од македонската креаторка Ивана Кнез за насловната страница на магазинот „Глорија“. Таа вторпат носи накит од Кнез, откако лани во април носеше уникатен црвен ѓердан на годишната изложба на хрватските архитекти.
„Имам особена привилегија што првата дама на Хрватска, за новогодишната насловна страница на Глорија повторно одбра накит со мој дизајн, кој беше специјално изработен за неа и во оваа прилика“, вели Ивана, која објави неколку фотографии на своите социјални мрежи.
Првата дама на Хрватска е позната како љубител на необичен и впечатлив накит, со кој секогаш го привлекува вниманието во јавноста.
