Од 22 септември во Синеплекс ќе се прикажува македонскиот филм „Те дуа, жими мене“. Станува збор за независен филм од жанрот сатирична комедија работен во 2019 година.
„Tе дуа, жими мене“ е приказна за тројца другари – квази фраер, коцкар и хармоникаш – кои запаѓаат во мафијашка зделка трудејќи се да ја вратат купената невеста назад во Албанија.
Филмот е во режија на Марјан Гавриловски, а сценариото е на Никола Кузелов.
Валентин Видовиќ ја направи оригиналната музика за филмот, а кинематографер е Александар Карпузовски.
Главните улоги ги играат: Никола Кузелов, Атанас Атанасовски, Ангела Стојановска и Валентин Видовиќ, а во останатите улоги ќе ги видиме: Тони Михајловски, Игор Џамбазов, Сенко Велинов, Исмаил Касуми, Мими Таневска, Владо Јовановски, Мирсад Абази, Фирдаус Неби, Рујиш Беговска, Елдин Широки и Береда Решит.
Продуцент е Марјан Гавриловски, а извршни продуценти се Александар Трајковски и Ивана Мирчевска.
Оригиналната музика во трејлерот со кој се најавува филмот е на Мишел Трајковски, изведувана од него лично, како и Џамбо Агушев, Благојче Трајковски, Иван Кукиќ и Дејвид Демир.
„Филм што ќе го гледате повеќе од три пати. Филм од кого ќе цитирате реплики дур сте живи. Филм што требаше одамна да се сними. Филм за нас. Не пропуштајте, ќе зажалите. Жими мене“, напиша Игор Џамбазов на Инстаграм.
