Непознат маж на аукција плати 28 милиони долари за патувањето во вселената со основачот на „Амазон“, Џеф Безос. Тоа ќе биде првиот туристички вселенски лет на компанијата „Блу ориџин“ на Безос, што е закажан за 20 јули на годишнината од слетувањето на „Аполо 11“ на Месечината. Почетната цена за седиштето изнесуваше 4,8 милиони долари.
Името на победникот ќе биде откриено набргу. Тој победи на онлајн-аукцијата на која учествуваа речиси 6.000 лица од 143 земји, а наддавањето траеше помалку од десет минути. Парите од наддавањето ќе бидат дадени на Клубот за иднината, фондација на компанијата „Блу ориџин“.
Безос на почетокот на овој месец објави дека ќе биде на првиот туристички лет на својата компанија „Блу ориџин“, кој ќе трае 10-ина минути. Со него ќе лета и брат му Марк.
