Светски познатата оперска дива Анџела Георгиу буквално беше ѕвезда на вечерта на „Охридско лето“. Не само што ја воодушеви публиката со својата отменост и настап, туку и со својот гламур, па приреди несекојдневен концерт.
Меѓу популарните опери беше и „Кармен“ од Жорж Бизе. Оперската дива доби десетици громогласни аплаузи. На сцената смени дури два фустани. За почеток одбра светли тонови, а потоа со црвен фустан кој се претопи со моќта на нејзиниот вокал кој никого не го остави рамнодушен.
Оперската дива настапи со Оркестарот на Националната опера и балет на Република Македонија, под диригентската палка на извонредниот Чипријан Теодорашку од Романија.
Диригентот Теодорашку неколкупати во текот на концертот и ги бакнуваше рацете на оперската дива, во знак на признание и благодарност.
Таа се вбројува меѓу најдобрите изведувачи во историјата на операта, со исклучителна вокал-техника и длабока драмска и музичка интелигенција.