По Штип, Битола, Велес, Прилеп и Кочани караванот „Македонијо во срце те носиме“ утревечер, 4 октомври, патува кон Тетово. Пред последниот концерт во Скопје, следуваат уште два од предвидените вкупно осум концерти, во исто толку македонски градови.
Концертот е закажан со почеток во 20:00 часот, а ќе се одржи на Градскиот плоштад. На репертоарот и во градот под Шара ќе се најдат сите 12 песни од проектот, а „Заветна“, „Налеј, налеј“, „Народе македонски“, „Едно име имаме“, „Земјо македонска“, „Ој, Вардаре“, „Оган да го гори“, „Послушајте патриоти“, „Ми заплакало село Ваташа“… и овој пат ќе бидат отпеани од златните грла на Бојана Скендеровски, Сузана Спасовска, Наум Петрески, Зуица Лазова, Андријана Јаневска, Александар Тарабунов, Огнен Здравковски, Марија Спасовска, Мина Блажев, ДНК, Ламбе Алабаковски и Миле Кузмановски.
„Македонијо во срце те носиме“ е проект со потписот на Скендеровски продукција, а сите 12 родољубиви песни во ново руво ги спакува маестро Николче Мицевски. Проектот има за цел да им се продолжи векот на песните и да се испрати порака особено до младите генерации дека треба да го чуваме она што го имаме, највредното – нашата земја и нејзиното наследство.
