Планинар кој се изгубил на планина во Колорадо стана вирален откако беше објавена приказната за неговото спасување.
Имено, планинарот, чијшто идентитет не е откриен, се изгубил на највисокиот врв во државата Колорадо, планината Елберт во 2021 година. Спасувачите го барале 24 часа, но не успеале да го лоцираат на неговиот телефон.
Пет членови на спасувачкиот тим биле распоредени околу 22 часот за да ги пребаруваат областите од планината Елберт, но се вратиле околу 3 часот наутро следното утро, откако не успеале да го лоцираат исчезнатиот планинар на врвот висок 4401 метри.
Вториот тим тргнал во 7 часот наутро следниот ден да ги пребарува областите каде што планинарите често знаат да се оддалечат од патеката, за потоа да откријат дека човекот се вратил во своето место на сместување околу 9:30 часот.
Планинарот им рекол на властите дека се изгубил и се нашол на различни патеки обидувајќи се да ја лоцира соодветната патека пред конечно да стигне до својот автомобил следното утро, околу 24 часа откако тргнал на пешачење.
„Ако доцните според вашата маршрута и почнете да добивате повторени повици од непознат број, ве молиме одговорете на телефонот; можеби е тим за пребарување и спасување кој се обидува да потврди дека сте безбедни!“, порачаа спасувачите на „Фејсбук“.
Веста дека планинарот ги игнорирал повиците од спасувачите, своевремено предизвика голем број реакции и критики во јавноста, на што спасувачите одговорија дека она што изгледа здраворазумно од страна, не е исто ако се најдете изгубени и во паника.
