Се што консумираме значително влијае на нашето целокупно здравје. Иако одредени видови храна придонесуваат позитивно за здравјето, други можат да ни наштетат, особено кога станува збор за ризикот од развој на различни видови на рак, предупредува онколошкиот диететичар Никол Ендрјус.
„Иако генетиката сигурно игра улога во ризикот од рак, се верува дека различни фактори на животниот стил, особено исхраната, претставуваат значителен дел од ризикот. Она што го јадеме може да влијае на различни биолошки процеси како што се воспаление, регулација на хормоните и поправка на ДНК кои се клучни фактори за развој на рак“, изјави таа за Парад.
Таа сподели еден вид храна што ја избегнува за да го намали ризикот од развој на рак.
„Јас лично избегнувам преработено месо како сланина, шунка и колбаси, бидејќи постојат силни докази од човечки студии дека тие можат да предизвикаат рак, особено рак на дебелото црево“, објаснува таа.
Иако има многу намирници за кои постои сомневање дека го зголемуваат ризикот од рак, тврдите докази за причинско-последична врска со ракот се сериозна работа.
„Храната што предизвикува рак директно ја оштетува ДНК и може да иницира развој на рак“, вели Ендрјус. Покрај тоа, Меѓународната агенција за истражување на ракот (IARC) го класифицира преработеното месо како канцерогена група 1.
Диететичарката објаснува дека таквата храна се прави со нитратни и нитритни конзерванси кои можат да создадат соединенија кои предизвикуваат рак, познати како N-nitroso за време на готвењето или варењето. Уште повеќе, истражувањата покажуваат дека готвењето преработено месо на високи температури, исто така, може да произведе штетни соединенија како хетероциклични амини (HCAs) и полициклични ароматични јаглеводороди (PAHs), кои исто така се поврзани со развојот на рак, заклучува Ендрјус.
