При планирање патување во еден од европските градови, добриот јавен превоз и лесните пешачки патеки се клучни за целокупното искуство. Ново истражување откри кој град нуди најдобри услови за истражување без автомобил, а победникот, за многумина, е Атина.
Хотелската компанија „Акор“ анализираше податоци за градовите низ целиот континент, земајќи предвид фактори како што се пешачките зони во центарот на градот, разновидноста и достапноста на јавниот превоз и близината до главните атракции, пишува „Дејли меил“.
Атина е на врвот со речиси совршен резултат
Грчката престолнина го освои првото место со импресивен резултат од 99,75 од 100. Особено се издвои со својата пешачка зона што го опкружува Акропол, овозможувајќи им на туристите да уживаат во историските знаменитости без пречки. Атинските квартови како што се Плака, Монастираки и Псири се лесно достапни пеш, додека крајбрежјето и аеродромот се добро поврзани со трамвај и метро.
Интересни факти за Атина
Улична уметност и модерни населби – Атина е полна со мурали, алтернативни галерии и подземни простори. Квартови како Кипсели и Панграти денес се вистински креативни центри со винтиџ продавници, модерни барови и коворкинг простори.
Мал остров во средината на метрополата – населбата Анафиотика, сместена под Акропол, изгледа како да сте патувале на Санторини – бели куќи, сини прозорци и тесни улички. Совршено за Инста-фотографии и кратко бегство од градската толпа.
Град и плажа во ист ден – само 30 минути ве делат од центарот до морето. Атинската ривиера нуди кафулиња, барови на плажа и кристално море – идеално за комбинација од култура и релаксација.
300 сончеви денови годишно – Атина има повеќе од 300 сончеви денови годишно, што значи дека скоро секогаш е „време за тераса“. Совршено за долг бранч, улична храна и прошетка низ старите квартови.
Кафето како начин на живот – Грците го измислиле фрапето, а кафето е нивен ритуал. Секоја улица има свое „ит“ кафе – од минималистички пекари до тераси на покривот со поглед на Акропол. Комбинација од античко и футуристичко. Во истиот ден, можете да го разгледате Партенон, да пиете кафе под муралот посветен на Сократ и да работите од футуристички коворкинг простор. Атена живее во ритамот на старото што се среќава со новото.
Локален дизајн и винтиџ сцени – грчките брендови или концепт продавниците во центарот нудат локален дизајн, ракотворби и облека со карактер. Нема брза мода – само автентичност.
Ноќен живот со поглед – Атина е полна со барови на покриви со поглед на Акропол, како и неформални клубови со жива музика и диџеи.
Минхен и Лисабон се веднаш зад Атина
Минхен се најде на второто место со резултат од 97,7. Посетителите што пристигнуваат со авион лесно можат да стигнат до историскиот центар на градот со воз, а самиот центар е идеален за истражување пеш. Градот нуди и густа мрежа на трамваи и удобна линија на метрото.
Лисабон се најде на третото место со резултат од 91,28 за разновидност на транспортот. Португалската престолнина нуди широк спектар на опции – од метро до фериботи што ги носат посетителите по реката Тахо.
Бугарската престолнина Софија се најде на високото четврто место со резултат од 88,16. Градот постигна 90 проценти за пристапност и практичност, а се издвојува со 24-часовен билет за превоз што чини само две евра. Посетителите можат да пешачат до многу од знаменитостите на градот.
Најдобрите европски градови за одмор без автомобили:
Атина
Минхен
Лисабон
Софија
Хамбург
Виена
Порто
Мадрид
Цирих
Лион
