Инвазивната и опасна риба лав сè повеќе се шири низ Јадранското Море, а научниците и надлежните институции веќе преземаат конкретни мерки за нејзино следење и отстранување. Станува збор за предаторска морска врста која во последните години забрзано се проширува низ Средоземјето, а сега е сè позастапена и во хрватскиот дел од Јадранот. Поради отровните боцки и сериозното влијание врз локалниот морски екосистем, експертите предупредуваат дека ситуацијата може да стане сериозен еколошки проблем.
Стручњаците алармираат дека рибата лав претставува голема закана за природната рамнотежа во морето бидејќи се храни со помали риби и други морски организми, што доведува до намалување на бројноста на автохтоните видови и нарушување на синџирот на исхрана. Токму поради тоа е покренат проектот „Зајакнување на националните капацитети за контрола на рибата лав во Хрватска“, а првите активности веќе се реализирани во Националниот парк Мљет.
Националниот парк Мљет е избран како пилот-подрачје затоа што токму таму досега е регистрирано најголемо присуство на рибата лав во Хрватска. Управата на паркот учествувала во организацијата на теренските активности, обезбедила логистичка поддршка и ги вклучила своите вработени во собирањето податоци и спроведувањето на морските акции.
Во рамки на акцијата било организирано и пробно отстранување на опасните примероци кое траело три дена. Во операцијата учествувале шест нуркачи, а сите уловени единки биле предадени на Институтот за океанографија и рибарство во Сплит, каде ќе бидат спроведени дополнителни анализи.
Поради опасноста од отровните боцки, нуркачите користеле специјален метод на лов со таканаречено хавајско копје без механизам за активирање. Според експертите, овој начин овозможува прецизен и селективен лов со минимално влијание врз останатите морски видови и природното живеалиште. Дополнително била изработена и специјална посуда за безбедно складирање на уловените примероци со цел да се намали ризикот од повреди.
Надлежните најавуваат дека следната акција ќе се спроведе во подрачјето на Телашчица. Иако таму рибата лав засега не е масовно присутна, научниците предупредуваат дека нејзиното ширење низ Јадранот продолжува и дека навремената реакција е клучна за спречување на поголеми последици во иднина.
Експертите додаваат дека борбата против оваа инвазивна морска врста во наредните години би можела да стане еден од најголемите предизвици за заштита на Јадранското Море.
