Повеќе од два века мистериозното суштество познато како „Шамп“ ја буди љубопитноста на жителите и посетителите на езерото Шамплејн во Северна Америка. Иако низ годините биле пријавени стотици сведоштва за средби со необично суштество кое наводно се крие под површината на езерото, досега не е пронајден ниту еден конечен доказ што би го потврдил неговото постоење.
Сега, двајца филмски автори тврдат дека можеби случајно го снимиле најубедливиот доказ досега за легендарното суштество наречено „Шамп“, кое често го нарекуваат и „американскиот Неси“, според славното чудовиште од шкотското езеро Лох Нес.
Езерското чудовиште Шамп, според бројните сведоштва, живее во езерото Шамплејн – водена површина долга околу 200 километри што се протега меѓу американските сојузни држави Њујорк и Вермонт, како и дел од канадската територија.
Сведоците најчесто го опишуваат како огромно суштество налик на змија или праисториски плесиосаур со долг врат, темно тело и карактеристични грпки на грбот. Токму поради ваквите описи, многумина го споредуваат со легендарниот Неси.
Филмските автори Ричард Роси и Кели Тејбор велат дека необичното суштество било снимено сосема случајно додека работеле на семејниот филм „Lucy and the Lake Monster“, инспириран токму од легендата за Шамп.
Според нив, камерата забележала необичен објект што се движел низ водата зад нивниот дрвен чамец долг околу 3,3 метри. Интересно е што никој од екипата не забележал ништо необично за време на снимањето, а снимката останала незабележана речиси две години.
Дури во текот на монтажата во 2025 година, Кели Тејбор забележала нешто што веднаш ѝ го привлекло вниманието.
„Кога го видов тоа, ми изгледаше како суштество со тенок врат, додека остатокот од телото постепено стануваше сè поголем. Не личеше на ниту една риба што сум ја видела во езерото. Изгледаше како вратот да се движи лево-десно, како нешто да бара под водата“, изјавила Тејбор.
Нејзиниот колега Ричард Роси признава дека првично бил скептичен кога му кажала што открила.
„Не ѝ поверував веднаш. Но кога ми се јави и ми рече да ја погледнам снимката на голем екран, останав изненаден од она што го видов“, изјавил Роси.
Легендата за Шамп трае повеќе од 200 години. Првото широко документирано модерно сведоштво датира од 1819 година, кога капетанот Крам во заливот Булвага наводно видел огромно црно суштество.
Според неговиот опис, станувало збор за животно долго околу 57 метри со очи што личеле на излупен кромид. Оттогаш се регистрирани стотици слични сведоштва.
Некои веруваат дека Шамп би можел да биде преживеан плесиосаур – морски рептил од праисторијата, додека други претпоставуваат дека станува збор за зеуглодон, древен предок на денешните китови.
Скептиците, пак, сметаат дека наводните појавувања најчесто се резултат на погрешни проценки, големи риби, пловечки стебла, необични бранови или оптички илузии.
Мистеријата околу Шамп одамна стана дел од локалната култура. Градот Порт Хенри во државата Њујорк со години се промовира како дом на легендарното чудовиште, а бројни фестивали, туристички атракции и локални бизниси ја користат легендата како дел од својот идентитет.
Кели Тејбор, која пораснала во близина на езерото, вели дека уште како дете сонувала да го види Шамп.
„Секое лето пловевме со чамец по езерото и постојано гледав во водата надевајќи се дека еден ден ќе го видам“, раскажува таа.
Подоцна, како студентка, доживеала уште едно необично искуство. Додека седела на тераса покрај езерото со пријатели, забележала необичен траг на мирната водена површина.
„Се движеше директно кон нас. Не доаѓаше од страна и не личеше на обичен бран. Кога се доближи до брегот, одеднаш сврте под агол од 90 степени и исчезна“, се присетува Тејбор.
Откако ја откриле необичната снимка, авторите ја испратиле на анализа кај научници и истражувачи. Видеото набрзо го привлекло вниманието и на продуцентите на телевизиската емисија „The UnXplained“ на History Channel, чиј водител е актерот Вилијам Шатнер.
Според нив, снимката би можела да претставува најсилен доказ за постоењето на Шамп уште од познатата фотографија што во 1977 година ја направила туристката Сандра Манси, а која и денес се смета за едно од најпознатите наводни сведоштва за чудовиштето.
Роси истакнува дека новата снимка има една важна предност – во кадарот јасно се гледа и чамецот, што овозможува полесна проценка на големината на објектот што се движи низ водата.
Откако видеото беше објавено на интернет, собра стотици илјади прегледи и повторно ја разгоре дебатата меѓу оние што веруваат во постоењето на Шамп и скептиците кои сметаат дека нема доволно докази.
И повеќе од 200 години по првото пријавено појавување, мистеријата на „американскиот Неси“ продолжува да ја фасцинира јавноста и да ги тера луѓето внимателно да ја набљудуваат површината на езерото Шамплејн во надеж дека ќе здогледаат нешто необично под неа. :::
