Една црно-бела фотографија направена во 1943 година во Рејкјавик, Исланд, повторно стана вирална на социјалните мрежи откако корисниците забележаа необичен детаљ што отвори нов бран теории за патување низ времето.
На историската фотографија, снимена за време на Втората светска војна, се гледа група војници и цивили на прометна улица во главниот град на Исланд. Но, вниманието на јавноста го привлече еден елегантно облечен маж кој стои настрана од толпата и држи предмет до увото на начин што многумина го споредуваат со користење мобилен телефон.
Токму оваа сцена предизвика лавина реакции на интернет, а некои корисници дури тврдат дека фотографијата може да биде доказ за патник низ времето.
Четири децении пред појавата на мобилните телефони
Теориите добија дополнителна тежина поради фактот што првиот комерцијално достапен мобилен телефон – Motorola DynaTAC 8000X – се појави дури во 1983 година, цели 40 години по создавањето на фотографијата.
Фотографијата првпат ја сподели Кристјан Хофман, чието семејство со децении ја поседувало снимката.
„Американската армија го презема исландскиот шарм, како што можете да видите“, напиша Хофман кога ја објави фотографијата.
Но токму мистериозниот маж му го привлекол вниманието.
„Најинтересниот детал е човекот во средината на фотографијата кој изгледа како да разговара на мобилен телефон“, напиша тој.
Интернетот поделен: Мобилен телефон или нешто сосема обично?
По објавата започнаа бројни шпекулации.
Додека дел од корисниците се убедени дека мажот држи предмет што потсетува на мобилен телефон, други нудат далеку поприземни објаснувања.
Некои сметаат дека човекот едноставно си го чеша увото, други претпоставуваат дека држи џебен часовник до увото за да провери дали работи, а трети веруваат дека можеби станува збор за мал радио-приемник.
Сепак, и оваа теорија има недостаток бидејќи првите транзисторски радија се појавиле дури во 1950-тите години.
„Изгледа како човек од иднината“
Хофман дополнително ја поттикна фантазијата на интернет-корисниците.
„Изгледа отсутно, стои сам, носи поинаква капа од останатите луѓе, има шал и се однесува токму како што би се однесувале денес додека разговараме на телефон“, напиша тој.
Токму ваквите детали ги охрабрија љубителите на мистерии и теории на заговор да ја прогласат фотографијата за еден од најинтересните можни „докази“ за патување низ времето.
Се појавија и шпионски теории
Некои корисници на социјалната мрежа X отидоа чекор подалеку и предложија дека мистериозниот човек можеби бил шпион.
Ваквите претпоставки се поврзуваат со историскиот контекст на фотографијата.
Иако Исланд официјално бил неутрална држава за време на Втората светска војна, островот бил под контрола на сојузничките сили. Велика Британија го окупирала Исланд во 1940 година за да спречи можна германска инвазија, а подоцна одбраната ја презела американската армија.
Поради тоа на фотографијата навистина можат да се видат американски војници низ улиците на Рејкјавик.
Мистерија која веројатно никогаш нема да биде решена
И покрај бројните теории, историчарите и експертите нагласуваат дека нема никакви докази кои укажуваат дека мистериозниот човек навистина користел мобилен телефон или некаква напредна технологија што не постоела во тоа време.
Сепак, фактот што неговиот идентитет никогаш не бил откриен, како ни предметот што го држи до увото, остава простор за нови шпекулации.
Повеќе од осум децении по нејзиното создавање, фотографијата продолжува да ја интригира јавноста. За едни таа е обичен историски момент погрешно протолкуван низ современа перспектива, додека за други останува една од најфасцинантните мистерии поврзани со можноста за патување низ времето.
