Австралискиот премиер Ентони Албаниз се најде во центарот на јавноста откако даде контроверзен коментар за светски познатата поп-ѕвезда Кајли Миног за време на гостување во подкаст. По бурните реакции во јавноста и политичките кругови, тој јавно се извини, признавајќи дека неговата изјава била несоодветна.
Контроверзата започнала кога Албаниз гостувал во подкастот на австралиската комичарка Ники Озборн, која му поставила прашање од типот „би имал секс, би се оженил или би излегол“, нудејќи му да избере помеѓу поп-ѕвездата Кајли Миног, актерката Никол Кидман и забавувачката Ронда Берчмор.
Премиерот првично се обидел да го избегне одговорот, потсетувајќи дека неодамна стапил во брак.
„Само што се оженив, поминаа само шест месеци“, одговорил тој.
Сепак, по дополнителното инсистирање на водителката, Албаниз ја избрал Кајли Миног и рекол:
„Кајли, јасно.“
Кога Озборн продолжила со прашањето дали би се оженил, би имал секс или би излегол со неа, премиерот одговорил:
„Сè од наведеното, таа е одлична.“
Изјавата веднаш предизвика бројни критики. Политичари и јавни личности оценија дека ваквиот коментар е несоодветен за шеф на влада.
Еден пратеник го нарече настапот „целосно несоодветен“, додека друг оцени дека премиерот покажал непочитување кон жените и го нарушил угледот на функцијата што ја извршува.
По силниот притисок, Албаниз излезе со кратка јавна реакција.
„Недвосмислено се извинувам за коментарите“, изјави австралискиот премиер.
Албаниз се ожени во ноември минатата година, а ова е една од ретките ситуации во кои негов настап во медиумите предизвика толку големо внимание и политички реакции во Австралија.
