Очекуваната должина на работниот век во Европската Унија продолжува да расте и во 2025 година достигна просек од 37,5 години, покажуваат најновите податоци на Евростат. По краткиот пад за време на пандемијата во 2020 година, европскиот пазар на труд повторно бележи позитивен тренд, но разликите меѓу земјите-членки и понатаму се значителни.
Според статистиката, просечниот работен век во ЕУ во последната деценија е продолжен за повеќе од две години. Во 2016 година изнесувал 35,2 години, а денес достигнува 37,5 години. Единствениот прекин на овој раст бил во 2020 година, кога поради пандемијата од Ковид-19 просекот паднал на 35,6 години.
Холандија убедливо е на врвот на листата со најдолг очекуван работен век – дури 44 години. Тоа значи дека просечен жител таму ќе помине повеќе од четири децении на пазарот на трудот.
Веднаш зад Холандија се:
– Шведска – 43,4 години
– Данска – 42,6 години
– Естонија – 41,5 години
– Ирска – 40,7 години
– Германија – 40,2 години
– Финска – 40,1 година
Од друга страна, најкраток очекуван работен век имаат граѓаните на Романија, каде просекот изнесува само 32,7 години. Следуваат Италија со 33 години и Бугарија со 34,6 години.
Во регионот, Хрватска има просечен работен век од 35,1 година, додека Словенија стои подобро со 37,2 години, што е речиси на нивото на европскиот просек.
Податоците покажуваат и значителни разлики меѓу мажите и жените. Мажите во Европската Унија во просек ќе работат 39,5 години, додека кај жените просекот изнесува 35,4 години.
Најдолг работен век кај мажите е забележан во Холандија – 45,9 години, додека кај жените рекордер е Шведска со просек од 42,3 години.
Сепак, Евростат нагласува дека родовиот јаз постепено се намалува. Причината е сè поголемото учество на жените на пазарот на трудот, подобрата достапност на работни места и продолжувањето на професионалната кариера во многу европски земји.
Експертите оценуваат дека зад овој тренд стојат повеќе фактори. Населението живее подолго, пензиските реформи во многу држави ја продолжуваат работната активност, а сè повеќе постари лица остануваат вклучени на пазарот на трудот. Воедно, економските услови, нивото на вработеност, здравствената состојба на населението и можностите за професионален развој имаат клучно влијание врз тоа колку долго луѓето остануваат активни во работниот процес.
Според Евростат, очекуваниот работен век претставува проценка за тоа колку години едно лице ќе биде дел од работната сила во текот на својот живот, земајќи ги предвид актуелните стапки на вработеност и економска активност. Овој показател сè почесто се користи како важен индикатор за состојбата на пазарот на трудот и одржливоста на пензиските системи во Европската Унија.
