Македонија се вбројува меѓу европските земји со релативно ниски годишни трошоци за енергија по жител, покажува анализата на Visual Capitalist, изработена врз основа на податоци од Меѓународната агенција за енергија (IEA).
Според анализата, во 2025 година просечните годишни издатоци за енергија во Македонија изнесувале 451 американски долар по лице. Во пресметката се вклучени трошоците за електрична енергија, греење, гас и други енергенси што ги користат домаќинствата, додека горивата за транспорт не се опфатени.
Со ова ниво на трошоци, Македонија се наоѓа во долниот дел од листата и значително под голем број европски држави.
На врвот е Шведска, каде просечните годишни трошоци за енергија достигнуваат 1.926 долари по жител. Следуваат Финска со 1.786 и Австрија со 1.709 долари. Меѓу земјите со високи издатоци се и Данска, Германија и Швајцарија.
Висината на сметките во овие држави не зависи само од цената на енергијата. Значајна улога имаат постудената клима, повисокиот животен стандард и приходите, големината на домовите и количината на потрошена енергија.
Во регионот разликите се значителни. Албанија има просечен годишен трошок од 247 долари по жител, Косово 294, Црна Гора 424, а Бугарија 444 долари. Македонија е на 451 долар, додека повисоки трошоци се регистрирани во Србија – 587 долари, Хрватска – 637 и Словенија – 812 долари годишно по жител.
Сепак, пониската сметка за енергија не значи автоматски дека една држава е енергетски поефикасна.
Авторите на анализата посочуваат дека врз вкупните издатоци влијаат повеќе фактори – климатските услови, приходите на населението, потрошувачките навики, големината и енергетската ефикасност на домовите, цените на енергенсите, како и државните субвенции и другите механизми за поддршка.
Пониските трошоци во земјите со пониски приходи, на пример, можат да бидат последица на помала потрошувачка на енергија, помали станбени површини, потопла клима или пониски регулирани цени, а не нужно на подобра енергетска ефикасност.
Анализата опфаќа вкупно 66 земји, при што европските држави убедливо доминираат меѓу оние со највисоки трошоци. Дури 24 од првите 30 земји на листата се од Европа.
Македонија, иако географски припаѓа на европскиот континент, според овие податоци останува меѓу земјите со пониски годишни издатоци за енергија во домаќинствата, со просек од 451 долар по жител во 2025 година.
