Холивудските ѕвезди Зендаја и Том Холанд, според повеќе странски медиуми, организирале приватна свадбена прослава со семејството и најблиските пријатели, неколку месеци откако наводно тајно стапиле во брак.
Прославата, како што објавува „People“, се одржала во вторникот во луксузниот хотел „Beaverbrook“, голем селски имот во Сари, Англија, недалеку од местото каде што пораснал Том Холанд.
Според „The US Sun“, младенците презеле строги мерки за да ја зачуваат приватноста на настанот. На сите гости, како и на персоналот, им било забрането да користат мобилни телефони.
„Том и Зендаја направија сè за да не протечат информации или фотографии. Затоа ниту гостите, ниту персоналот не смееја да ги користат своите телефони“, изјавил извор за британскиот таблоид.
Според истите информации, Холанд (30) и Зендаја (29) изнајмиле цел имот за повеќе од 670.000 долари, претворајќи ја прославата во целосно приватен настан.
Гласините дека двојката веќе е во брак првпат добија на тежина во март годинава, кога долгогодишниот стилист на Зендаја, Ло Роуч, на доделувањето на SAG наградите изјави дека свадбата веќе се одржала.
„Свадбата веќе се случи. Ја пропуштивте. Тоа е вистина“, изјави тогаш Роуч за „Access Hollywood“.
Во истиот период, актерката дополнително ги поттикна шпекулациите кога беше фотографирана со венчален прстен, наместо со впечатливиот веренички прстен со дијамант од пет карати.
Двојката ја објави свршувачката во јануари 2025 година, кога Зендаја се појави со дијамантскиот прстен на доделувањето на „Златните глобуси“.
Иако јавноста очекуваше поголема свадбена церемонија, Роуч неодамна изјави дека не верува оти ќе има второ, јавно венчавање.
„Мислам дека луѓето едноставно треба да им честитаат. Тоа се двајца млади, успешни и вљубени луѓе кои успеаја да имаат приватна свадба и да ја зачуваат само за себе“, рече тој.
Ниту Зендаја ниту Том Холанд досега официјално не го потврдија бракот, но со неколку изјави индиректно ги поттикнаа сомнежите.
Во интервју за „Esquire“ во јуни, Холанд беше прашан дали морал да им објаснува на своите блиски за фотографиите создадени со вештачка интелигенција од нивната свадба.
„Не, затоа што сите тие беа таму“, кратко одговори актерот.
Неколку недели подоцна, за време на промоцијата на филмот „Spider-Man: Brand New Day“ во Мексико, Зендаја на обожавател кој ја побара за жена му одговори со насмевка: „Предоцна дојде.“
Љубовната приказна на Зендаја и Том Холанд започна во 2017 година за време на снимањето на филмот „Spider-Man: Homecoming“. Иако првично ги негираа гласините за романса, во јули 2021 година беа фотографирани како се бакнуваат во автомобил во Лос Анџелес, со што ја потврдија својата врска.
Неколку месеци подоцна Холанд ја направи нивната љубов „официјална“ и на Инстаграм, објавувајќи фотографија од снимањето на „Spider-Man“ со пораката: „Мојата МЏ, нека ти е најсреќен роденден. Јави ми се кога ќе станеш“, на што Зендаја одговори: „Се јавувам веднаш.“
