Новиот тренер на Црвена ѕвезда, Алберт Риера, потпиша двегодишен договор со белградскиот клуб, а според информациите од српските медиуми, шпанскиот стратег ќе има исклучително добри финансиски услови.
Договорот бил потпишан на Мајорка, каде што Риера моментално престојува, а најдоцна до недела се очекува да пристигне во Белград и да ги преземе обврските во новиот клуб.
Според пишувањата во Србија, Риера во првата сезона ќе заработи 960.000 евра, додека во втората година од договорот неговата плата ќе изнесува 980.000 евра.
Тоа значи дека за двете сезони шпанскиот тренер би требало да инкасира вкупно 1,94 милиони евра.
Риера, сепак, нема да има многу време за адаптација и запознавање со новите фудбалери. По пристигнувањето во Белград ќе има само четири дена за да го подготви тимот за првиот натпревар против Викторија П’лзењ во плејофот за пласман во групната фаза на Лигата на Европа.
Во досегашната тренерска кариера Риера ги предводеше Олимпија, Цеље во два наврати, Бордо и Ајнтрахт Франкфурт.
Неговиот период во Германија не се одвиваше според очекувањата, додека најдобрите резултати ги забележа на клупата на Цеље.
Со ангажманот во Црвена ѕвезда, Риера станува само петтиот странски тренер на клубот кој доаѓа надвор од просторот на поранешна Југославија.
Пред него, Црвено-белите ги предводеа Валтер Зенга, Здењек Земан, Рикардо Са Пинто и Барак Бахар.
За Риера веднаш следува сериозен предизвик, бидејќи без многу време за подготовка ќе треба да го внесе тимот во важната европска пресметка со Викторија П’лзењ.
