Фудбалерите на Хал продолжија со одличните настапи во новата сезона од Премиер лигата, освојувајќи бод против Челси на „Стемфорд Бриџ“ во возбудлив натпревар кој заврши 2:2.
По победата над Манчестер Јунајтед со 2:0, ремито без голови против Астон Вила и триумфот над Ковентри од 1:0, избраниците на Сергеј Јакировиќ покажаа дека можат да им создадат сериозни проблеми и на најголемите англиски клубови.
Челси го започна натпреварот според посакуваното сценарио и поведе уште во седмата минута преку Морган Роџерс. Хал, сепак, возврати со два брзи погодоци на Мохамед Белуми во 28. и во 34. минута, со кои гостите направија целосен пресврт и на паузата заминаа со предност од 2:1.
„Тигрите“ го задржаа водството до 66. минута, кога Жоао Педро се најде на вистинското место и погоди за конечни 2:2. Хал имаше можност и целосно да го шокира фаворитот во завршницата, но не ги искористи своите шанси за трет погодок.
Разочарувачка партија пред своите навивачи одигра и Ливерпул. „Црвените“ не успеаја да се наметнат против Фулам, па средбата на „Енфилд“ заврши без голови – 0:0.
На другите натпревари, Нотингем форест славеше на гостувањето кај Астон Вила со 2:1, Бормут и Брентфорд ги поделија бодовите играјќи 2:2, додека Ипсвич го совлада Кристал палас со 3:2.
