Ед Ширан бил принуден да го промени почетокот на концертот во Филаделфија откако сите најавени предгрупи се повлекле од неговата турнеја „Loop“ во знак на солидарност со Меклмор.
Концертот на стадионот „Линколн фајненшл филд“ првично требало да започне во 17:30 часот, но почетокот бил поместен за 20 часот – времето во кое Ширан и претходно бил планиран да излезе на сцената по настапите на предгрупите.
Останатите концерти од северноамериканскиот дел на турнејата засега остануваат закажани за 17:30 часот, а британскиот пејач сè уште не објавил кои изведувачи би можеле да ги заменат повлечените музичари.
Четири изведувачи се повлекоа од турнејата
Финеас, Лукас Греам, Арон Роу и ирската група „Беога“ во вторникот соопштиле дека се повлекуваат од турнејата во знак на поддршка за Меклмор.
Финеас на Инстаграм порача дека уметниците не треба да бидат замолчувани кога зборуваат во одбрана на угнетените и јавно ја изрази својата поддршка за Палестина.
Нивното повлекување следуваше откако Меклмор беше отстранет од програмата на турнејата по неговиот настап на стадионот „Метлајф“ во Њу Џерси.
За време на настапот тој извикал „Слободна Палестина“ и ја извел протестната песна „Hind’s Hall“ од 2024 година.
Песната е именувана по Хинд Раџаб, петгодишно палестинско девојче кое загина во Газа.
Меклмор тврди дека одлуката ја донел тимот на Ширан
Меклмор преку Инстаграм објави дека одлуката за негово отстранување од турнејата ја донеле Ширан и неговиот тим.
Раперот нагласи дека Ед Ширан го смета за близок пријател и „брат“, но тврди дека пејачот му пренел оти Роберт Крафт не би му дозволил да настапи на стадионот „Жилет“ во Масачусетс.
Крафт е сопственик на „Крафт груп“, компанијата што управува со стадионот, кој требаше да биде домаќин на дел од концертите на турнејата.
Ширан: Одлуката ја донесе промоторот
Ед Ширан ја отфрли одговорноста за отстранувањето на Меклмор, објаснувајќи дека одлуката ја донел промоторот на турнејата.
Според пејачот, договорот на Меклмор бил склучен со промоторот, а не директно со него. Ширан тврди дека се обидел да посредува меѓу двете страни и да најде решение.
Тој посочи дека проблемот не бил само во политичката порака, туку и во начинот на кој Меклмор ја пренел за време на настапот.
Ширан подоцна изјави дека случувањата во Газа се „катастрофални и неоправдани“ и се извини за начинот на кој се развивала ситуацијата. Неговото објаснување дека Меклмор бил отстранет по одлука на промоторот го пренесе и Ројтерс.
Го нападна и неговиот братучед
Контроверзијата дополнително се засили откако братучедот на пејачот, Џетро Ширан, јавно го нападна на Инстаграм.
Тој го нарече Ед „себичен“, „злобен“ и „лукав“, обвинувајќи го дека се обидува да создаде пресметана јавна слика со која би ги задржал големите приватни настапи и договорите со познатите брендови.
Џетро тврдеше дека неговиот братучед се грижи единствено за сопствените интереси и изрази согласност со негативните реакции што пејачот ги добива на социјалните мрежи.
Дел од обожавателите бараат да им бидат вратени парите
По отстранувањето на Меклмор и повлекувањето на останатите изведувачи, дел од обожавателите побараа враќање на парите за купените билети.
Некои од нив порачаа дека билетарниците можат повторно да ги понудат нивните места на други посетители, бидејќи повеќе не сакаат да присуствуваат на концертите.
Случајот предизвика поширока дебата за слободата на говорот на музичарите, политичките пораки на големите концерти и влијанието што сопствениците на стадионите и промоторите го имаат врз програмата на турнеите.
