Кралицата Ранија уште еднаш покажа зошто нејзините модни изданија редовно го привлекуваат вниманието на јавноста. За време на престојот во Њујорк, таа наместо класични панталони или здолниште избра широки црни бермуди и ги претвори во неочекувано префинет избор.
Јорданската кралица е позната по способноста да ги спои кралската елеганција и актуелните модни трендови, а овој пат се оддалечи од традиционалното протоколарно облекување со софистицирана комбинација во темни тонови.
Ранија престојува во Њујорк заедно со својот сопруг, кралот Абдула Втори, кој учествува на 81. заседание на Генералното собрание на Обединетите нации. Општата дебата се одржува од 22 до 28 септември, со присуство на бројни светски лидери и меѓународни делегации.
Бермудите како замена за класичното одело
За една од своите обврски кралицата избра темнозелена блуза и широки црни бермуди, покажувајќи дека деловната елеганција не мора секогаш да подразбира класично одело.
Главниот впечаток го создадоа бермудите „Dior Homme“, кои Ранија ги носела и претходно. Моделот има широк крој и должина под колената, поради што при движење потсетува на миди здолниште.
Струкот го истакна со црн ремен со златна тока, кој ги поврза двата главни дела од комбинацијата и ѝ даде појасна структура на силуетата.
Бермудите во последните сезони сè почесто се појавуваат и во елегантната гардероба, а кралицата Ранија покажа како можат да се носат и во поформални дневни пригоди. Поширокиот крој и должината до колената изгледаат значително попрефинето од класичните кратки панталони, особено во комбинација со женствена блуза и чевли со високи потпетици.
Романтичната блуза го омекна строгиот изглед
Во горниот дел Ранија носеше нова блуза „Nicolette“ од дизајнерката Ула Џонсон, во длабока зелена нијанса.
Моделот се издвојува со висока јака украсена со карнери, ситни набори и кратки ракави. Романтичните детали внесоа мекост во комбинацијата и создадоа интересна рамнотежа со речиси машкиот крој на широките бермуди.
Токму спојот на женствената блуза и строго скроениот долен дел беше клучот за современиот и софистициран изглед.
Внимателно избрани модни додатоци
Посебно внимание кралицата посвети и на модните додатоци.
Во раката носеше нова црна чанта „Le Teckel“ од модната куќа „Alaïa“, изработена од козја кожа. Нејзината препознатлива издолжена форма одлично се вклопи со геометрискиот и широк крој на бермудите.
Наместо класични црни салонки, Ранија избра лакирани темнозелени чевли „Jennifer 90“ од „Malone Souliers“. Моделот со шпицест врв и тенки ремчиња околу глуждовите се надоврза на бојата на блузата и визуелно ја заокружи целата комбинација.
Косата ја носеше пуштена и обликувана во меки бранови, додека шминката беше во топли и природни тонови. Неколкуте дискретни парчиња накит беа доволни за на стајлингот да му дадат завршна доза сјај.
Со ова издание, кралицата Ранија уште еднаш покажа дека и неочекуваните модни парчиња можат да изгледаат кралски елегантно кога се внимателно комбинирани.
