Новиот адвентски календар на Меган Маркл, кој чини 148 долари, предизвика расправија на социјалните мрежи откако британски свештеник предложи многу поевтина алтернатива. Во расправијата се вклучи и негов колега, по што двајцата добиле навредливи пораки од дел од поддржувачите на војвотката од Сасекс, пренесуваат британските медиуми.
Календарот на брендот „As Ever“ е изработен во соработка со производителот на чоколади „Compartés“ од Лос Анџелес. Содржи 24 чоколади и е дел од празничната понуда на брендот.
Англиканскиот свештеник Даниел Френч на социјалните мрежи предложил христијански адвентски календар со чоколадо од фер трговија, божиќна приказна и книшка со активности. Цената на производот што го посочил е околу шест фунти.
Неговата објава предизвикала остри реакции. Некои корисници го обвиниле дека ја напаѓа Меган, додека други му испратиле лични навреди. Во негова одбрана се огласил и свештеникот Крис Филипс, кој потоа се соочил со слични реакции и го ограничил пристапот до својот профил.
Дел од корисниците сметаат дека свештениците непотребно го критикувале производот на Меган. Други, пак, велат дека споредувањето на цените и предлагањето алтернатива не оправдува лични напади.
Расправијата се случува додека Меган ја проширува празничната понуда на „As Ever“, во која, покрај адвентскиот календар, има и подарочни пакети со чаеви, овошни намази, чоколади и свеќи.
