Актерот Ар Џеј Мите, најпознат по улогата на Волтер Вајт Џуниор во серијата „Breaking Bad“, почина на 34-годишна возраст. Неговите претставници ја потврдија смртта во понеделник, 12 октомври, а колегите Брајан Кренстон, Арон Пол и Дин Норис се простија од него со пораки на тага и почит.
Според „Ројтерс“, Мите починал во Браунсвил, Тексас. Неговиот претставник потврдил дека станува збор за самоубиство, без да соопшти дополнителни детали за околностите.
Кренстон, кој го играше неговиот татко Волтер Вајт, објави заедничка фотографија на Инстаграм и се присети на нивната прва средба, кога Мите имал само 14 години.
„Со длабока тага го пишувам ова вечерва. Ар Џеј Мите, мојот драг син од ‘Breaking Bad’, почина“, напиша актерот.
Во објавата, Кренстон ја истакна решителноста со која неговиот млад колега им пристапувал на снимањата. Мите живееше со церебрална парализа, а според Кренстон, на напорниот распоред одговарал со голема посветеност и ентузијазам.
Тој се присети и како Мите ги слушал советите од него и од Ана Ган, која ја играше неговата мајка, но понекогаш, како и секој тинејџер, сакал сам да учи од сопствените искуства.
„Малку по малку, гледавме како израснува во навистина добар актер“, порача Кренстон.
Актерот откри дека се допишувале само неколку недели претходно и се договарале за ручек. Во своето простување нагласи колку го сакал Мите и колку му значело времето поминато со него.
Со емотивна порака се огласи и Арон Пол, кој го толкуваше Џеси Пинкман.
„Немам зборови. Срцето ми е скршено од оваа вест. Ар Џеј, те сакам, пријателе. Ќе ни недостигаш“, наведе Пол, додавајќи порака до читателите дека се сакани и дека не се сами.
Дин Норис, познат како Хенк Шрејдер, напиша дека секогаш се грижел за Мите како за млад член на екипата. Го опиша како прекрасно младо момче и изрази сочувство до неговото семејство.
Покрај актерската кариера, Мите беше посветен на застапувањето на правата на лицата со попреченост. Сопственото искуство го користеше за да ја подигне свеста за нивната застапеност на екранот и за потребата од поголема вклученост во филмската и телевизиската индустрија.
