Жељко Самарџиќ беше во Скопје, на промоција на својата нова песна „Знам“ која ја снимија со Калиопи. Во разговорот ни откри дека секогаш со задоволство пее во Македонија, и дека тоа навистина го мисли, затоа што, како вели „љубовта не можеш да ја скриеш“.
Вели дека е свесен дека публиката го сака, и особено е горд што и врсниците на неговиот внук ги знаат неговите песни. „Песните се мое оружје, а јас ги пренесувам чувствата на луѓето. Веројатно тоа е една од причините што допирам до мојата публика“, открива Жељко Самарџиќ во разговорот за Репортер.
Не е тајна дека е многу едноставен и дека никогаш заради популарноста не се чувствува над другите. „Оние кои ме познаваат знаат дека јас и со видеопораки честитам родендени на мои обожаватели, им праќам пораки на инстаграм, ма јас сум народен човек и таков ќе останам“, вели Жељко.
Зборувавме и за Марина Туцаковиќ, чии песни му ја отворија вратата на популарноста. „Најлошо се чувствувам кога ќе отидам таму на гробишта, гледам три гроба, а Фута стои до мене скршен. Марина живее со песните и таа е дел од мене“, вели Жељко. Најави и голем концерт во Македонија, иако како вели не само Скопје, се радува во секој град каде што доаѓа да пее.
А.Георгиев
