Денеска, 13 јуни, во киносалата на Кинотеката на Македонија ќе се одржи проекција на германскиот хакерски хит „Кој сум јас?“ Филмот ќе биде прикажан со македонски и со албански титли, а во соработка со Гете-институтот.
Оваа криминалистичка драма, која собра добар дел од германските филмски награди во 2014 година, е приказна за младиот Бенџамин, несигурно момче што се чувствува незабележано, невидливо и безвредно. Кога со групата нови пријатели ќе го формира субверзивниот хакерски колектив CLAY, ќе се впушти во докажување на своите способности – пред другарите и пред меѓународната хакерска заедница – преку саботажа на информатичките системи на неколку владини институции и влијателни фирми создавајќи хаос во работењето и сообраќајот на градот.
Германската федерална криминална полиција и Европол му се зад петиците, а Бенџамин ќе мора да се бори против нив и да се надмудрува со својот хакерски идол и ментор – злогласниот MRX. Тој повеќе не е невидлив и незабележлив, напротив, сега сите зборуваат за него и сакаат да го уловат.
Својата премиера „Кој сум јас“ ја имаше на меѓународниот фестивал во Торонто во 2014 година, потоа следуваа Палм Спрингс, Берлиналето итн. Поради драмските пресврти и графички елементи, филмот „Кој сум јас“ често е споредуван со Финчеровиот „Борачки клуб“ од 1999 година и хит-серијата „Господин Робот“.
Режијата е на Швајцарецот Баран бо Обан, а во главните улоги настапуваат Том Шилинг, Елјас М’барек, Трине Дирхолм, Хана Херцспрунг, Леонард Кароу. Музиката на филмот е избор на германскиот продуцент и технаџија Бојс Нојз. Влезот за филмската проекција е бесплатен.
