Љубителите на рок музиката и безвременските хитови на легендарните Pink Floyd на 23 јули ќе имаат можност да уживаат во уникатен музички спектакл во амбиентот на Античкиот театар во Охрид. Станува збор за новото издание на „NUMB – Tribute to Pink Floyd“, проект зад кој стојат врвни музичари и продукциски тим посветен на верно пренесување на магијата на еден од најголемите рок бендови во историјата.
Организаторите најавуваат концертно доживување кое ќе ги задоволи и најпребирливите обожаватели на култната британска група. Покрај високото ниво на музичка изведба, големо внимание ќе биде посветено и на сценската продукција, визуелните ефекти и квалитетот на звукот, со цел публиката да добие целосно аудиовизуелно искуство по кое Pink Floyd беа препознатливи ширум светот.
На концертот ќе бидат изведени некои од најголемите хитови и највредните музички дела на легендарниот бенд, меѓу кои „Shine On You Crazy Diamond“, „Learning to Fly“, „Hey You“, „Another Brick in the Wall“, како и бројни други композиции што оставија неизбришлива трага во историјата на рок музиката и влијаеја врз генерации музичари и обожаватели.
Pink Floyd важат за една од највлијателните и најуспешни рок групи на сите времиња. Со своите концептуални албуми, препознатлив звук и длабоки текстови, тие создадоа музика која не е само за слушање, туку и за размислување. Нивните песни обработуваат теми поврзани со човековата психа, општествените состојби, политиката, животните предизвици и егзистенцијалните прашања, поради што нивното творештво и денес има огромна вредност и влијание.
Токму затоа организаторите порачуваат дека овој настан не треба да се пропушти, особено од оние кои сакаат повторно да ја почувствуваат атмосферата на музиката што ги одбележа седумдесеттите, осумдесеттите и деведесеттите години.
Концертот „NUMB – Tribute to Pink Floyd“ ќе се одржи на 23 јули во Античкиот театар во Охрид и е дел од програмата на овогодишниот S.O.S. Festival 2026, во организација на „Fresh Union – Film, Music and Booking Agency“.
Настанот е поддржан од Министерството за култура на Македонија, а билетите веќе се пуштени во продажба и можат да се обезбедат преку платформата Way In, како и на продажното место „Аждерот“ во Охрид.
Охридското лето оваа година ќе добие уште еден спектакуларен музички настан, а љубителите на Pink Floyd ќе имаат ретка можност под отворено небо, во еден од најубавите амбиенти во Македонија, повторно да уживаат во музиката која со децении ги освојува срцата на милиони луѓе ширум светот.
