Саудиска Арабија го објави дизајнот за новиот футуристички град „Линија“. Станува збор за 170 километри долг облакодер, што ќе се протега од Црвеното Море до северозападниот дел на земјата и треба да биде дом на девет милиони луѓе. Облакодерот ќе има фасада од огледала, ќе биде висок 500 метри, а широк само 200 метри. Целосно ќе се напојува од обновливи извори на енергија.
Структурата ќе се состои од два ѕида, меѓу кои ќе има отворен простор. Ќе има станбени, трговски и рекреативни области, паркови и училишта. Двата блока ќе бидат поврзани со повеќе мостови и покриени со зелени површини.
„‘Линија‘ ќе му даде уникатен карактер на градот и ќе овозможи целосно претопување со околината, а внатрешноста ќе нуди извонредни искуства и магични моменти“, велат од владата на Саудиска Арабија.
Економистите, архитектите и аналитичарите го опишуваат проектот „Линија“ како урбана утопија, но се сомневаат и дека нема да се реализира. За разлика од нив, престолонаследникот на Саудиска Арабија вели дека тоа е „цивилизациска револуција која ги става луѓето на прво место, а е драматична алтернатива за традиционалните, хоризонтални градови“. Саудискиот принц е и инвеститор на овој футуристички град.