Актерката Памела Андерсон, поранешна ѕвезда од популарната серија „Чувари на плажата“, беше една од познатите личности кои присуствуваа на овогодинешната Мет Гала. Таа беше во друштво на нејзиниот син Брендон Томас Ли (28).
Андерсон прошета по црвениот тепих во сив фустан украсен со кристали, но токму нејзината фризура привлече најголемо внимание. Таа ја скрати долгата руса коса и покажа нова боб фризура, а на лицето немаше шминка.
Мет Гала традиционално се одржува првиот понеделник во мај во Метрополитен музејот на уметност во Њујорк, а покрај тоа што ги собира познатите личности од светот на модата, музиката и филмот, има и хуманитарен карактер.
Овогодинешната тема Superfine: Tailoring Black Style се фокусираше на модната историја на афроамериканските мажи од 18 век до денес. Дрес-кодот „Кроен за вас“ им даде можност на гостите да го изразат својот стил преку персонализирани кроеви и реинтерпретација на машката мода.
