Тоше Зафиров ја отвори душата во искрена исповед со која ја изненади јавноста, откривајќи дека во минатото навистина ја изневерил сопругата Габриела. Иако важи за еден од најпосветените семејни луѓе на социјалните мрежи, каде често споделува моменти исполнети со нежност и љубов, Зафиров призна дека зад себе има периоди кои не му се чест.
Поводот за неговото обраќање беа пораки од луѓе кои тврделе дека „глуми светец“ и дека во минатото правел грешки. Во видеообјава на Инстаграм тој одговори директно и без задршка.
„Многупати ми пишуваат: ‘Немој да глумиш светец, знаеме што правеше.’ Да, точно е. Имам погрешено. И искрено, да можам да го вратам времето, никогаш не би погрешил. Рано сфатив дека ги повредувам не само Габи, туку и нашите деца, нашите семејства.“
Тој појасни дека грешките се случиле во младоста, во период кога работел како обезбедување во дискотеки, воена полиција и други средини во кои, како што вели, „искушенијата се големи“. Но токму тие искуства, според него, го натерале да се промени и да стане подобар човек, сопруг и татко.
Денес, вели тој, секојдневно се труди да го чува и негува бракот со сопругата Габриела, со која е заедно веќе 25 години.
„Години наназад постои само една жена во мојот живот – Габи. Уживам да ја држам за рака и после три децении. Таа е мој благослов,“ изјави Зафиров, нагласувајќи дека секое недоразбирање во нивниот дом се решава со разговор и разбирање, без инат и без одолговлекување.
