„Алказар Енерџи Партнерс“ обезбеди финансиско затворање за изградбата на Ветерниот парк Штип, проект вреден 180 милиони евра, кој е најголемиот ветерен енергетски проект досега развиен во Северна Македонија.
За реализација на проектот е обезбеден пакет од повеќе од 115 милиони евра приоритетно должничко финансирање од Европската банка за обнова и развој, Меѓународната финансиска корпорација и „Ерсте груп“. Дополнителна локална кредитна линија за ДДВ е обезбедена од „Шпаркасе банка АД Скопје“.
Ветерниот парк ќе има инсталирана моќност од 131,25 мегавати и ќе се состои од 21 ветерна турбина, секоја со моќност од 6,25 мегавати. Проектот има обезбедено долгорочен договор за откуп на електричната енергија со меѓународна компанија со инвестициски кредитен рејтинг.
Од „Алказар Енерџи Партнерс“ нагласуваат дека проектот се реализира врз основа на приватен договор за откуп на електричната енергија, без државна финансиска поддршка.
Се очекува ветерниот парк да биде целосно пуштен во употреба до 2028 година. Според процените на инвеститорот, тој ќе произведува доволно чиста електрична енергија за снабдување на повеќе од 148.000 домаќинства годишно и ќе спречува емисија на околу 573.000 тони јаглерод диоксид-еквивалент годишно.
Во фазата на изградба и за време на работењето се очекува да бидат ангажирани повеќе од 300 лица, со што проектот треба да придонесе и за отворање нови работни места и за економски развој на локалните заедници.
Ветерниот парк Штип е првата од трите планирани фази во рамките на поширок кластер на ветерни електрани на територијата на општините Штип, Карбинци и Радовиш. По целосната реализација, кластерот треба да достигне вкупна инсталирана моќност до 396 мегавати и повеќе од четирикратно да го зголеми постојниот капацитет за производство на електрична енергија од ветер во Северна Македонија.
Инвеститорот најавува дека изградбата на следните фази би требало да започне во наредните месеци. Целокупниот проект е дел од инвестициската платформа за праведна енергетска транзиција на Северна Македонија, промовирана на климатската конференција КОП28.
Коосновачот и управувачки партнер на „Алказар Енерџи Партнерс“, Даниел Калдерон, изјави дека финансиското затворање е резултат на соработката со Владата, локалните партнери, кредиторите и инвеститорите. Тој посочи дека проектот ќе обезбеди чиста и достапна електрична енергија и ќе отвори нови работни места.
Премиерот Христијан Мицкоски оцени дека станува збор за инвестиција која, по реализацијата на сите планирани фази, ќе достигне вредност од околу половина милијарда долари. Тој нагласи дека Владата ќе продолжи да ги поддржува гринфилд-инвестициите кои придонесуваат за зголемување на домашното производство на електрична енергија и за раст на македонската економија.
