На вториот регионален состанок на министрите за енергетика во Белград, министерката Сања Божиновска со колегите од Србија, Грција и Бугарија разговараше за конкретни чекори за поголема енергетска сигурност и подобро поврзување на земјите во регионот.
Во фокусот беа развојот на нови коридори, диверзификацијата на изворите и правците на снабдување, како и поефикасното користење на постојната енергетска инфраструктура. Министрите разговараа и за поврзувањето на гасните и електроенергетските системи.
Според Божиновска, вклучувањето на Македонија во Вертикалниот гасен коридор создава можност за нов правец на снабдување преку Грција. Во тој контекст, значајни се и гасните интерконектори со Грција и Србија, кои треба дополнително да ги поврзат енергетските мрежи.
На состанокот беше разгледан и коридорот Исток–Запад, поврзан со развојот на електроенергетската инфраструктура и прекуграничната размена на електрична енергија. Поголемата поврзаност, според министерката, треба да придонесе за поотпорен регионален енергетски систем.
„Македонија станува важна енергетска врска во регионот“, порача Божиновска.
