Младиот математички талент Македон Димитровски повторно ја прослави Македонија на меѓународната сцена, освојувајќи златен медал, највисок индивидуален резултат и престижната награда „George Lenchner“ на престижната математичка олимпијада MOEMS во Соединетите Американски Држави.
Станува збор за уште еден историски успех на младиот македонски гениј, кој во исклучително силна светска конкуренција успеа да се искачи на самиот врв и да ги надмине своите врсници од целиот свет.
На натпреварот најпрво освои златен медал во екипна конкуренција, а потоа го постигна и најдобриот индивидуален резултат на целата олимпијада. Како дополнително признание за неговото извонредно знаење и резултати, му беше доделена и престижната награда „George Lenchner“.
Особено импресивен е податокот дека Македон Димитровски триумфирал во конкуренција од дури 56.913 млади натпреварувачи од различни делови на светот, што неговиот успех го прави уште позначаен.
Гордоста од овој резултат ја сподели и неговиот татко Владимир Димитровски, кој на социјалните мрежи истакна дека успехот е резултат на долгогодишна посветеност, огромен труд и љубов кон математиката.
Ова не е прв голем меѓународен успех за Македон Димитровски. Тој веќе подолго време важи за еден од најперспективните млади математичари и е препознаен како талент со потенцијал за врвни научни достигнувања во иднина.
Само пред неколку недели, во мај годинава, тој испиша нова страница во македонската спортска и образовна историја освојувајќи два златни медала на Германската математичка олимпијада, каде исто така се натпреваруваше во исклучително силна меѓународна конкуренција.
Со најновото злато од САД, Македон Димитровски уште еднаш покажа дека Македонија има млад шампион кој со своето знаење, талент и посветеност поставува нови стандарди и испишува историја на светските математички натпревари.
